實作文章
Cursor 兩個月實戰連載（1/6）：新建 YouOwnClub，點解揀 Cursor 同 AI 再起步
連載導讀：呢個系列共 6 篇，記錄 2026 年 3 月底至 5 月，我用 Cursor 同 AI 由 Blog 做到學生交功課系統嘅過程。下一篇：工具同服務點揀。
呢個連載按 2026 年 4 至 5 月時間序，記錄我用 Cursor 新建 YouOwnClub 嘅過程：Blog 同各 LP 先上線，跟住交功課站，後期先加通知同其他功能。
4 月第一週，我只係開 GitHub 專案、第一次上載、第一次本機預覽。我唔追求完美一次過做晒；先令一個可見改動上線，再一層層加。
呢篇係連載起點。唔係 step-by-step 教學文，而係我點解再起步，第一週自己摸索發生咩事，同當時點同 Cursor 傾計。
呢篇你會讀到乜
我想用一篇交代背景，唔想跳過「點解要新建 YouOwnClub」同「點解係 Cursor」。你會見到我第一個月嘅節奏、第一次有效嘅 Cursor 對話係點嘅樣、同我點樣用簡短筆記記住每日卡關位。技術細節會喺第 2～6 篇逐層展開；呢篇只負責幫你代入「再起步」嘅心境。
我唔係靠「重新手寫每一行 code」
我慢慢接受一個分工：我唔使逐行手寫 code，但我一定要做產品負責人。4 月我嘅工作其實好具體：識得講清楚「Blog 同 Lead magnet 想做到乜」、識得喺瀏覽器驗收「上載之後真網址開唔開到頁」、識得用版本管理留低「今次改咗乜」。「學生交功課要咩流程」、登入同作業頁點驗收，我並唔係一開始就有；係 5 月中旬我先動工交功課站，為將來學生交功課流程舖路，唔係當時已有學生等緊用。Cursor 對我嘅價值，就係將施工速度拉高，但判斷權仍然喺我手上。
第一個月，我畀自己嘅目標好細：唔追求完美，但要 Blog、主頁、禮品頁同 LP 各自分 GitHub 專案、分部署，管道先通，避免一改 build 全部陣亡。交功課站係 5 月中旬先有嘅動工，亦係第一個要登入同資料庫嘅產品；當時係為將來舖路，功能自然會收窄，唔使喺 4 月腦入面空想「要唔要做購物車、預約、留言板」。
同期我開始用資料夾名做簡短工作筆記，每個名就係當日卡關位（例如 GitHub 設定、Blog 建立）：
圖：桌面「網頁建立」資料夾列表；4 月中下旬先有「blog 建立」，之前係 GitHub、Cloudflare 等準備工作。
4 月上旬我先搞掂 GitHub（版本標籤、新舊對照、上載流程）同 Cloudflare（Pages、Workers、D1 各自免費額度同收費點）。當時未開 Blog 專案，但我已經記低：Pages 放靜態網頁，Workers 先至跑 API 同登入。至於 static site、SSR 呢啲英文名，要等多個星期、真係開 Blog 專案嗰陣，先逐個問 Cursor 先理清。
點解 YouOwnClub 要新建，唔再砌 WordPress？
YouOwnClub 係全新品牌、全新站，唔係將舊站搬去 Astro。4 月我想試 Lead magnet、自訂表單流程，愈嚟愈唔想再喺插件同主題之間遷就；主題仲會反過嚟限死你改嘢，一改往往就要花好多時間。
舊 WordPress 託管喺網頁寄存公司，HTTP 轉 HTTPS 要另外開服務，一年 199 蚊；Cloudflare 配好 DNS 之後，SSL（網址前面嗰把鎖）同自動轉 HTTPS 包喺入面，唔使為呢一樣再額外開支。
仲有一個原因同屋企有關：我個女讀緊中學，學校教佢用 Wix 砌網頁。老實講，我唔明點解要用 Wix 學；讀書時或者覺得易上手，但到真係要起站、收 lead、做交功課流程嗰刻，好易就會揀返 Wix，跟住被模板、功能限制同月費一齊綁死。我想自己先行另一條路：檔案放喺 Git、域名同 DNS 自己管、改完可以 deploy 上線；名單同內容唔係困喺某個平台後台入面，將來要換託管或者改流程，都有得搬。咁樣佢將來先會知：做網頁唔等於每個月租一個 Wix 或類似平台；亦唔等於只識喺平台入面㩒掣，而係可以選擇自己擁有文件、自己決定放邊度。
另外有一樣我後期先講得出口：數位主權。名單、內容、部署流程，我想逐步攞返喺自己手度，而唔係所有嘢都綁喺一個後台、一個月租式平台。呢個唔係反 SaaS 情緒，而係一人公司要知邊啲位可以快，邊啲位唔可以交俾別人代決定。
所以我 4 月嘅大方向先定咗：唔再靠月租平台後台綁死內容，檔案同部署逐步攞返自己手度，用 AI 加快一改再改。唔係整作品集賣弄技術，而係做真正用得嘅教學基建。具體用 Astro + Cloudflare Pages 起 Blog，係中下旬對照完 WordPress、Ghost 等方案之後先拍板，唔係一開月就諗通晒。
揀 Astro 之前，我其實對照過乜？
呢度分兩層：Blog 用邊個平台，同 如果留 WordPress，用邊款主題。我喺另一份 WordPress 對照筆記寫過：長文 SEO 可以走 WordPress／Ghost；訂閱會員內容可以揀 Ghost／Patreon／WP＋會員外掛，但 決定咗就只維護一邊，唔好同一批內容兩邊各放一份、兩邊各改。我逐個對過：
| 方案 | 我當時點睇 |
|---|---|
| WordPress + SciCube | 課程主線：香港機房、一鍵裝 WP、後台改文熟悉；但要面對主題／外掛遷就、HTTPS 額外年費等（上文已講） |
| Ghost | 專做 Blog 同訂閱，上手快；但內容同版型仍然綁 Ghost 嗰套，唔係 Git + Markdown + Cursor 呢條我而家行緊嘅路 |
| Patreon | 適合付費會員牆同社群；唔係 yourownclub.com 長文 SEO 主戰場，亦唔方便同 Lead magnet、自訂 LP 喺主站一齊掂 |
| Astro + Cloudflare Pages | 檔案自己管、Markdown 出文、域名 SEO 喺自己度；配合 Cursor 改文同 deploy，同「攞返喺自己手度」一致 |
Blog 最後揀 Astro，唔係因為聽人講快，而係對比上述方案之後：我要嘅係 yourownclub.com 上面嘅長文 SEO + 將來可加 Lead magnet，又唔想再租多一個內容平台後台。
如果當時決定 留喺 WordPress，下一層就要揀主題。同一份對照筆記入面，我逐個睇過常見嘅免費主題，亦參考過幾個付費來源，作決策參考：
| 主題 | 我當時點睇 |
|---|---|
| Astra | 課堂示範首選；Starter Templates 快起貨，但進階版面好多掣要 Pro |
| Twenty Twenty-Five | 官方預設、最「純血」；結構清楚，但自由度靠 FSE／區塊，改嘢仍綁住主題框架 |
| Hello Elementor | 極簡畫布，配 Elementor 免費版砌頁；唔等於有 Pro 全部功能 |
| Kadence | 同類輕量區塊型，後台體驗唔錯；課堂為減少分叉唔另開示範線 |
| GeneratePress | 極輕、利開發；但要「由頭執到腳」先似樣，時間成本高 |
| Blocksy | Gutenberg 感覺新淨、結構利 AI 讀；美感好，但一樣係主題皮 |
付費方向我都有睇：ThemeForest（Envato Market） 款式多但要自己揀作者同更新頻率；Elegant Themes（Divi） 拖拉砌頁快，但愈砌愈重、維護綁喺佢哋生態。WooCommerce.com 我亦有睇過，但佢主打網店同電商方案，同我想做嘅 Blog、Lead magnet、內容站唔太相關，所以唔係我當時嘅主線。課堂口徑係：未跑通上線前，買再靚嘅主題都唔會自動幫你排名；付費多數買慳時間同面板，唔係買走「主題限死你改邊度」呢個根本問題。
結論唔係「免費定付費邊款主題贏」，而係：無論 Astra、Divi 定 ThemeForest 買返嚟嘅模板，你想改 Lead magnet 流程、自訂表單、將來加功能，都要喺主題同外掛之間遷就；主題仲會反過嚟限死你改邊度，一改往往就要花好多時間。Cursor 可以幫你寫 CSS 微調，但骨架仍然係 WordPress 嗰套。
所以我冇再花時間「揀第 N 個主題」或者「再開多一個 Patreon／Ghost 後台」，而係 4 月改行 Astro + Cloudflare Pages：Blog 用 Markdown 檔，改文好似改一份文件咁直接改字就得，唔使入 WordPress 後台，亦唔使為咗版位、CTA 或表單去遷就主題同外掛。Remix、Nuxt 呢啲框架對比，係後期規劃交功課站嗰陣先同 AI 查過，詳見 連載第 2 篇。
點解最後揀 Astro？ 上表已寫；要再對照框架、郵件、資料庫點揀，跟 第 2 篇。
Cursor 對話情境（4 月中下旬）：我唔知 Astro 係乜
開 Blog 專案嗰陣，我連「static site」同「SSR」都分唔清，唔識就逐句問 Cursor，唔跟官方文件由頭讀到尾。Cloudflare Pages 喺前面已經決定咗（其中一個原因係 SSL 唔使再額外開支）。之後喺 Astro、Ghost、WordPress 之間對照過一輪；因為要 Markdown 出文、檔案自己管，最後揀 Astro 起 Blog。先喺 GitHub 開 Blog 專案（下面「第一次上載前」再講），隔日先第一次碰 Astro，範圍只做本機骨架：SEO 嗰陣根本未諗；Lead magnet 同開 Blog 專案無關；deploy 留到本機 preview 通咗之後先問。
第一次碰 Astro，我唔係跟官方文件逐頁讀。當時 GitHub 專案只得說明文件同兩篇草稿，我連 Astro 要唔要申請帳號都唔知，所以逐個實際問題問：應唔應該先起 Astro 骨架、再接 Cloudflare Pages？本地 npm run dev 通咗先至上載？我唔係跟曬做；每問一個具體步驟，做完就對 本機預覽 或 GitHub 網頁 對一對，確認有改動先至下一步。本機預覽見到頁就停；連上 Cloudflare Pages、有真實文章上線之後，先至開始諗 sitemap、meta 呢啲 SEO 細節。
圖：我問應唔應該先處理 Astro；Cursor 建議本地 build 通咗先連 Pages。
圖：我問唔使去 Astro 申請先；Cursor 解釋用 npm create astro@latest 本地起項目就得。
點解揀 Cursor，而唔係淨係用 Gemini？
Gemini 我當成預習：問 Astro 係咩、文章開頭欄位（frontmatter）可以點寫、某段 code 起手可以點樣。佢答得唔錯，但我無叫佢改 GitHub 專案。
真正改檔案、除錯建置、上載之後驗收，我喺 Cursor 做。佢睇得到我個 GitHub 專案；後期尤其 Blog 同交功課站分開之後，我會喺對話講清楚開緊邊個專案、文章或程式要改邊個路徑。我實際遇過嘅，多數係 Blog 嘅 Markdown 被 AI 寫入錯誤嘅子資料夾，而唔係成個改錯另一個站；但講清楚路徑，至少唔會愈改愈亂。
我點同 Cursor 講
我其實無預先設計好長篇指令。主要係：諗到想講乜，就打入去；如果發現有字眼講唔清楚，或者形容得唔好，就即刻按停，改返再發過。唔係第一日就咁講究「一次講齊範圍」；係用得多，先慢慢學識少少講清楚「今次做乜、今次唔做乜」。
真係複雜嘅安全、合規、大流量架構，仍然要人類判斷。但對教學方做第一版，已經足夠將「做唔到」變成「今晚可試」。
第一週：自己摸索，但畀里程碑起咗名
我冇跟任何 Cursor 課程；就係開咗 Cursor，有問題就問，卡住就開新對話。後來回望，第一週其實做咗兩件好基本但好重要嘅事。
第一件：裝 Cursor、裝 Node.js（之後 Astro 本機預覽同建置都要用）、開 GitHub 專案、連 GitHub、第一次上載。聽落好無聊，但當上載成功、GitHub 上見到自己啲檔，個感覺就好似間舖終於有門牌。第二件：Astro Blog 有首篇文，本機 npm run dev 睇到頁。我冇正式上課，只係當自己新建緊 YouOwnClub，唔係喺舊站上面執執佢。
當時最大成就感，都唔係畫面靚。外觀、字大細、排版差唔多仍係 Astro 預設模板，我未執過品牌感。我記得嗰晚只係改咗一篇 Markdown 文章，瀏覽器 refresh 就見到新段落出現；重要嘅係 改字 → 預覽有反應 呢條鏈通咗，而唔係設計已經完成。呢個 moment 證明：我唔使先讀完一本書先開始，可以由一個細小、可驗收嘅改動開始；執靚留到之後先至做。
第一次上載：GitHub 先開門，再由 Cursor 推上去
我唔係喺本機自己初始化專案開始。第一步係去 GitHub New Repository，開一個 private Blog 專案，跟住照 GitHub 指示做，先推一個簡單說明檔上去，建立初始版本。之後先喺 Cursor 把 Astro 同文章推上去。
每次上載跑完之後，我習慣即刻開 GitHub 網頁確認。呢個習慣後來救我好多遍：以為上載成功，其實登入憑證過期或者推去錯咗另一個遠端位址。
我當時嘅迷惘
其中一個反覆出現嘅問題係：網站未完美，可唔可以寫、可唔可以俾人睇？我嘅經驗係，如果等到完美先出文，通常代表永遠唔出文。YouOwnClub 主站同 Blog 到而家都仲有位要執，但管道已經通，呢樣先重要。
仲有一樣：我應該學幾深？我後期畀自己嘅標準係要識驗收，唔使逐樣技術細節都背曬。改完之後，我會問自己：本機預覽見唔見到改動？上載之後真網址同本機一唔一樣？如果唔係，最可能卡喺邊一步？深度可以後補；真正交畀用戶唔可以無限期等。
我後來先學識點驗收
固定次序寫喺 第 3 篇：本機預覽通咗先上載，上線後瀏覽器消除快取再對真網址。第一週我只做到預覽；接 Pages、自訂網域同四關驗收，跟第 3 篇實戰節奏。
同現有文章嘅關係
呢個連載係時間線敘事，唔會重複 Blog 已有嘅 step-by-step 教學。如果你想跟住做，可以配合以下文章一齊睇：
快速上線流程，可以睇 Cursor + Astro 點 30 分鐘上線？。想理解「快但唔失控」，可以睇 乜嘢係 Vibe Coding？。連載會講我當時點諗；嗰啲文章講你可以點做。
本篇小結
4 月之前，我唔信自己整到交功課通知。4 月第一週，我只係新建 YouOwnClub、自己摸索 Cursor、第一次上載、第一次預覽。呢啲聽落好細，但係之後所有功能嘅地基。下一篇會講工具同服務點揀；你唔使一次記曬名詞，先問自己想解決乜問題就得。
下一篇預告
第 2 篇 進入工具同服務點揀：用「當時真係諗過乜」寫決策，唔係事後完美答案。由「自己想解決乜問題」開始就得。
常見問題 FAQ
完全唔識寫 code 都可以用 Cursor 做網站嗎？
可以入門快好多，但你要學識用結果驗收、用 Git 留版本、用部署平台睇真實環境。AI 加速，唔代表可以完全唔理判斷。
有 WordPress 經驗，轉 Astro 會唔會好難？
概念唔同：WordPress 係後台改內容；Astro 係檔案加 Git。最難嘅通常唔係語法，而係第一次搞掂 DNS、build、deploy 條鏈。
呢個連載適合邊類讀者？
想用自己網站做教學、收 lead、做小型工具，但又唔想再被 all-in-one SaaS 綁死嘅 solopreneur 或小型教學方。
About me
你好，我係阿丸。呢度以數位主權為核心，分享點樣用 AI 幫手整網頁、建立吸客贈品頁、整理內容同上線作品， 目標係幫你用更短時間把內容同網站做成可帶走、可維護嘅自有資產。
我會持續更新可跟做嘅教學、踩坑記錄同流程模板，等你唔使被平台黑盒綁死，亦唔使再由零重複試錯。
同時呢度會多寫一人公司最常遇到嘅訂閱制現實：工具加價、用量隱形成本、平台綁定風險， 同埋點樣用可執行嘅做法，將名單、主站同漏斗慢慢揸返喺自己手度。
你會見到嘅內容包括：支出檢視框架、用量上限與警報、搬遷前準備同主權策略；目標唔係一夜換晒工具， 而係先止血，再建立長期可維護嘅自有資產。
想先攞可跟做模板同檢查清單？
先由免費吸客贈品包開始，將文章做法變成你可即用嘅落地清單，再按需要對照服務範圍安排下一步。
想睇合作模式同交付範圍，可先睇服務與合作方式。