實作文章
Cursor 兩個月實戰連載（3/6）：Blog 上線到主站收尾（4 月～5 月上旬，開交功課站之前）
連載導讀：上一篇：工具同服務點揀 · 下一篇：交功課系統
4 月我嘅 KPI 好低，低到有啲人可能會笑：有人可以喺網址列輸入 yourownclub.com，睇到我寫嘅嘢。
唔係最𡃁 LP，唔係完整 funnel，甚至規劃中嘅頁面都未做完。但我而家回望，Blog 上線、出文節奏開始，同主頁、禮品頁、LP 分開 GitHub 專案唔互相拖死，先係呢段時間最關鍵嘅成果。門面唔靚可以後執；門面未開，就乜都未開始。
呢篇講乜、唔講乜
講： 4 月第二至四週點由本機改文推到真網址（上線驗收）；第四週執靚、追蹤同 SEO 最小集合；4 月底至 5 月上旬主站營運點驗收（預約當日電郵、郵件更新上線、表單防刷）。
唔重複： 第一週心境 → 第 1 篇；工具點揀（Cal.com、Resend 等）→ 第 2 篇；5 月中旬 學生交功課站 → 第 4 篇。Pages 設定逐步做法 → 五個常見錯誤、自訂網域 Checklist。
4 月：四週節奏
| 週 | 目標（夠低先易驗收） |
|---|---|
| 第一週 | 本機預覽見到頁（詳見第 1 篇） |
| 第二週 | GitHub 見到更新、Cloudflare Pages 建置成功 |
| 第三週 | 手機開 yourownclub.com/blog/ 唔話「不安全」 |
| 第四週 | GA4 有第一個非本人 page view；再加執靚、追蹤、出文（下文） |
我後期好慶幸冇反轉做「靚先上線」。solopreneur 靚係無底洞；上線先逼你面對網域設定、建置會唔會過、手機閱讀、載入速度。
4 月：由 Markdown 到真網址（第二、三週）
跟 Cursor + Astro 30 分鐘上線 類似，但我用成個月。唔係 Astro 難，而係要調 YouOwnClub 文章格式（分類、常見問題欄等）。我喺 Cursor 開住 Blog 專案，叫佢跟現有文章格式改，比逐頁睇官方文件易上手。
版本留底（Git）：一個產品一個 GitHub 專案；上傳前先睇有冇改錯檔；每做完一個可以驗收嘅改動就先儲存一次。登入權限過期、大專案入面再嵌細專案，我都中過。
Cloudflare Pages 我親身中過兩關（逐步圖文見教學文，呢度只記結論）：
- 第二週：後台顯示建置失敗，話搵唔到專案設定檔；其實 Astro 檔案喺 GitHub 入面再入一層子資料夾，要在 Pages 填專案根目錄先搵啱路徑（錯誤 1）。
- 第三週：後台顯示建置成功，但 yourownclub.com 仍舊內容；瀏覽器消除快取都一樣；最後係 自訂網域未綁好，唔係程式寫錯（跟 自訂網域 Checklist）。
固定四關驗收（之後主站、交功課站都沿用）：本機預覽見到改動 → 上傳 GitHub 後網頁見到更新 → Cloudflare Pages 建置成功 → 用手機或電腦瀏覽器開真網址、消除快取後同本機預覽一致。
網域（DNS）教訓：4 月下旬改追蹤同 SEO 嗰輪，網域紀錄越改越亂；若同 用 Workers 接 Blog、開錯網站 一齊查，更易走錯方向（見 第 2 篇「部署」）。靜態 Blog 喺 Pages 後台查，唔好同 Workers 混埋一齊改網域。
4 月下旬有一輪「Blog 唔見咗」排錯：先見 1014（跨帳戶 CNAME）、再見 522、404，最後確認係 DNS、Pages 專案根目錄、建置指令、輸出資料夾 同自訂網域唔一致，而唔係 Markdown 寫錯。blog.yourownclub.com 修復之後，我將 Root directory／npm run build／dist 寫成固定設定，避免下次再從零估。同一輪亦整理 LP 用一個專案底下多條路徑（例如新手線、WordPress 線），唔再當「一個 LP 一個 Pages 專案」咁硬分。
第四週：執靚、量度、出文
第四週我唔再追「完美設計」，而係 上線之後先補 幾樣可驗收嘅位。
外觀同 logo：頁首頁尾統一、品牌色同字體調整；改完一定跟四關驗收（本機預覽 → 上傳 GitHub → 建置成功 → 真網址消除快取），唔好只靠本機以為 OK。
捲動動畫（頁面動態效果）：加咗先發現手機閱讀同 PageSpeed 會跌；我保留少量，唔為動態效果拖 deploy。
PageSpeed：用 Lighthouse 或 PageSpeed Insights 做前後對照；目標唔係一次攞滿分，而係圖片大小、字體載入唔阻擋首屏。
出文：Markdown 草稿加 Cursor 批量改 title、description、內部連結。配合 Astro 內容工作流，4 月底已有 AEO guide、Lead magnet 框架、案例文。嗰啲文證明管道通，唔證明設計完美。
站點分工（4 月底同 Cursor 對過）：主站 Home 負責品牌同導流；Blog 係實作記錄同搜尋入口；About 講教學方背景；各 LP 收唔同受眾。我當時畫過一張簡單營銷漏斗地圖，目的唔係完美設計，而係每次加 CTA 都知應該指去邊，避免「每篇文各自為政」。
追蹤同 SEO：細步快跑
最小集合：GTM（Google Tag Manager）→ GA4 page view → Microsoft Clarity（捲動深度、狂㩒同一位置）。後期先喺 GTM 加一個 觸發條件（例如某 CTA 按鈕 click）；第一日唔砌複雜 funnel，先確認 GA4 有非本人 page view。
排除自己：GA4 排除內部 IP 或主瀏覽器 filter；否則 refresh 當流量。
SEO：4 月只做每篇 title/description、sitemap、robots；十步清單其餘跟 AEO guide 後補。
驗收：Clarity 曾顯示 LP 手機版 CTA 被遮；若唔睇數據，會誤判係文案問題。
4 月底至 5 月上旬：主站營運（只寫驗收同坑）
Blog 同真網址通咗之後，我收 預約、郵件、主站表單防刷；搞到勉強可營運，5 月中旬 先開交功課站 GitHub 專案（第 4 篇）。Cal.com、郵件（Resend）等決策見 第 2 篇。
預約
上線後改過 Cal.com 流程同通知。當日有客人提醒電郵驗收：真 booking 當日收件箱有信、寄件人名同預期一致。
坑：改完設定以為壞咗，其實係 Bot Fight Mode 誤傷真人 submit；逐個表單試過先信。全自建預約用第 2 篇 14 日規則擱置，唔再展開。
郵件營運
- 收唔到信：查 DNS、template 是否 publish、production 有冇 deploy。
- 改咗 template 仍舊文：要
npm run deploy（或該站既定 deploy）先更新線上內容。 - 兩步退訂：若將來做電子報，先諗退訂流程；兩個月內我無開 Brevo／MailerLite，寄信以 Resend 為主。
技術債：聯絡表搬去新版嵌入流程之後，後端仍係 GAS（Google 試算表細腳本）；專用郵件未接好，唔當已搬完。
主站表單防刷（funnel／LP）
Bot Fight Mode 加 rate limiting（速率限制）：驗收係真人正常 submit 要過到、連續狂刷先 429。
撤 自訂密鑰 header（曾喺前端傳，唔安全）：密鑰唔應出現喺瀏覽器或公開 GitHub 專案；改 Turnstile，公開金鑰同伺服器密鑰成對。交功課站點樣再加 Turnstile／上傳驗證見 第 5 篇，呢度唔重複。
一開始就分好：Blog、主頁、禮品頁、LP
YouOwnClub 唔係「先 Blog、5 月先 LP」；4 月起已分 GitHub 專案、分 Cloudflare 專案。主頁、禮品頁同各 LP（例如 Lead magnet，見框架文）都喺呢個架構內一路改。
第一個月最大心理障礙
Lint（程式碼靜態檢查） 係 Cursor 同編輯器喺你未跑網站之前，先掃一次原始碼嘅自動校對；唔合規則就畫紅色波浪線。我第一次見到以為成個專案「完咗」，後來先知多數只係格式或寫法提示（例如縮排唔統一、變數定義咗冇用），本機 npm run dev 仍然開得到。要分真係壞咗定只係 Lint，我而家會先問三樣：本機預覽開唔開到、npm run build 過唔過、紅字訊息寫乜。Node 同 npm 版本唔啱就唔同：我中過 npm install 刷滿 EBADENGINE 警告（本機 Node 太舊，唔夠專案寫明嘅最低版，例如 Astro 6 要 Node 22 以上）；又或者裝完表面冇事，一跑 npm run dev 或 npm run build 先突然 fail，錯誤訊息又長又難睇。再糟係本機同 Cloudflare Pages 用唔同 Node 版：本機 preview 開得到，推送上去雲端 build 先紅，好易誤以為自己寫錯 code，其實係環境唔同。轉捩點係將情緒改做可重現步驟；每次解決咗就開一個資料夾，用問題做標題，方便下次搵返。
交功課站有登入之後，「本機預覽通咗先上載」更加唔可以跳步：唔好同時開兩個預覽網址（例如 4321 同 4322）；若設定指住 A、瀏覽器開住 B，cookie 會去錯站，好易誤以為登入壞咗，其實只係本機開咗兩個預覽程序。應該停晒舊程序，只留一個（見 第 4 篇、第 5 篇）。
同現有教學文嘅分工
快速 deploy 睇 Cursor + Astro 30 分鐘上線。Cloudflare 錯誤睇 Pages 五個常見錯誤。連載講順序同坑；教學文講可 copy 步驟。30 分鐘文係濃縮版；我用成個 4 月行第一條完整流程，再加 5 月上旬收主站尾。
本篇小結
4 月 KPI 好低：yourownclub.com 睇到我寫嘅嘢。deploy 四週加第四週追蹤／執靚；5 月上旬收預約當日電郵、郵件 deploy、表單防刷。留言、購物車、funnel 拖曳等資料夾當時擱置（見第 2 篇）。主站勉強可營運後，5 月中旬 先開交功課站。
下一篇預告
第 4 篇 開始 5 月中旬交功課站：Plan 模式先梳理、專案說明寫清最小完整流程（登入、派功課、交功課）。主站預約同 Blog 管道已通；唔會再重複講 Cal.com 點揀。
常見問題 FAQ
第一個月應該花最多時間喺設計定部署？
部署同內容節奏。設計可以之後再執；網域或建置設定錯一次會令你以為「整唔成」，其實多數只係後台填錯。
GitHub 同 Cloudflare 連接最常卡邊？
Pages 專案根目錄指錯、Node 版本唔啱、建置輸出路徑唔啱。另有一類係大 GitHub 專案入面再嵌細專案，搞亂 Pages 專案。
上線後應該即刻做 SEO 定 analytics？
先做最小 analytics（知道有人入嚟），再做 SEO 基礎（title/description/sitemap）。唔使一次做晒十個 SEO 步驟。
預約同表單安全係咪都喺「第一個月」做完？
多數喺 4 月底至 5 月上旬做驗收同防刷；點揀 Cal.com 等見第 2 篇。交功課站係 5 月中旬另一條線，唔同 GitHub 專案。
About me
你好，我係阿丸。呢度以數位主權為核心，分享點樣用 AI 幫手整網頁、建立吸客贈品頁、整理內容同上線作品， 目標係幫你用更短時間把內容同網站做成可帶走、可維護嘅自有資產。
我會持續更新可跟做嘅教學、踩坑記錄同流程模板，等你唔使被平台黑盒綁死，亦唔使再由零重複試錯。
同時呢度會多寫一人公司最常遇到嘅訂閱制現實：工具加價、用量隱形成本、平台綁定風險， 同埋點樣用可執行嘅做法，將名單、主站同漏斗慢慢揸返喺自己手度。
你會見到嘅內容包括：支出檢視框架、用量上限與警報、搬遷前準備同主權策略；目標唔係一夜換晒工具， 而係先止血，再建立長期可維護嘅自有資產。
想先攞可跟做模板同檢查清單？
先由免費吸客贈品包開始，將文章做法變成你可即用嘅落地清單，再按需要對照服務範圍安排下一步。
想睇合作模式同交付範圍，可先睇服務與合作方式。