實作文章
Cursor 兩個月實戰連載（4/6）：5 月主線：用 AI 砌學生交功課系統（登入與最小完整流程）
連載導讀：上一篇：Blog 上線到主站收尾 · 下一篇：加功能與通知
4 月 Blog、主頁、禮品頁同各 LP 各自上線通咗之後，5 月中旬我先動工交功課站：唔係因為當時已有學生等緊用，而係為將來學生交功課流程舖路，唔好再長期依賴 WhatsApp 傳檔。
Blog 嗰陣我係逐個問題問、逐關驗收；交功課站因為涉及登入、資料庫同權限，我改咗做法：先用 Cursor 嘅 Plan 模式（先同 AI 排計劃、梳理問題同步驟，確認清楚先至動手改程式）同佢逐項對：登入點做、老師同學生點分開、資料庫要邊幾張表、第一版刻意唔做乜（上傳、WhatsApp 通知等）。Plan 完，先寫專案說明同「最小完整流程」，先至開 GitHub 專案同第一句「幫我起骨架」。唔係一開波就叫 AI 寫 code。
點解揀邊套登入同資料庫見 第 2 篇。呢篇只講 Plan 之後點樣用 AI 推到「登入、派功課、交功課」最小完整流程；上傳、安全、Email、WhatsApp 見 第 5 篇。
動工前我開咗工作筆記，標題就係當日要做嘅嘢（例如「建立學生交功課網頁」「登入同子網域」），同 4 月 Blog 做法一樣。
5 月中旬：兩日節奏
動工前：Plan 模式梳理完，專案說明寫明第一版唔做上傳、WhatsApp、批改進階功能；並列五項上線前檢查（登入、權限、用戶唔重複等），之後每次改登入相關功能都會跑。
第一晚：開 GitHub 專案，第一次匯入已經包含 Astro 6、D1、R2、Better Auth 骨架（唔係空專案慢慢加）。
第二日：節奏好密，一日內多輪改動：多檔繳交、教師頁曾經白屏（遠端資料庫更新腳本未跑齊）、Turnstile 同 Magic Link、教師 API。同日我又用 Pages 去加 homework.yourownclub，花咗好耐先醒起：交功課站應該跟 第 2 篇 講嘅 Workers 線 加子網域，唔係再犯 Blog 嗰個錯。呢個重複踩坑令我之後寫死：靜態用 Pages，要 API／session 用 Workers。
呢篇講乜
專案說明入面嘅最小完整流程、用 AI 砌系統三原則、常見「以為壞咗其實係設定」、同 Blog 分開做兩個專案；附 三個 Cursor 對話示例（開工範圍、用案例、本機同正式）。
規格寫喺文件，唔寫喺腦入面
Plan 模式梳理出嚟嘅嘢，我落實做一份專案說明（另有較長規格自用），最重要係：登入登出正常；學生開唔到老師專用頁；每位用戶資料對齊、登入兩次唔會變兩個人。
每次同 Cursor 開工講明「今次只做呢幾樣，唔好順手加上傳或通知」。我估計八成走偏係冇講「今次唔做乜」。另有五項上線前檢查（交功課、派功課、學生擋老師頁、登入過期、資料唔重複），每次改登入相關功能都跑。
Cursor 對話情境：最小完整流程開工
交功課站專案，附上專案說明。
今次只做：登入登出、學生擋老師頁、用戶資料唔重複。
唔好做檔案上傳、唔好做通知、唔好改畫面美化。
改完請列我手動驗收步驟，逐項打勾。用咩技術（一句）
網站用 Astro，登入用 Better Auth（Google 同電郵連結），資料放 Cloudflare D1。檔案上傳、人機驗證等留 第 5 篇。難處係第一次搞掂本機預覽同正式網址一致。
用 AI 砌系統三原則
先能跑，再靚。 資料庫腳本本機跑通 → 填好登入相關設定（本機網址要同瀏覽器開緊嘅一致）→ 登入後確認資料有寫入 → 測試帳改做老師再試派功課。
用案例代替「整個學習管理系統」。 例如：老師提交新作業後，學生頁見到標題；可以逐項打勾驗收。
一日只做一樣。 Cursor 好易順手加通知；要學識打斷。
Cursor 對話情境：用案例而唔係大系統
唔好整完整學習管理系統。只做：
- 老師填標題同截止日期並提交
- 學生登入後見到新作業
請改後台同最簡可用列表。
驗收：用另一個瀏覽器開學生帳見到標題；老師提交成功。第一晚收工嗰陣，後台同學生頁仍係 Astro 預設骨架味：字距、按鈕位置、列表好粗糙，坦白講好醜。但我照上面個驗收逐項做，老師提交成功、換另一個瀏覽器開學生帳睇到標題，當晚呢條最小流程係通嘅。執版面、統一品牌色同間距，我刻意留到之後；因為 4 月 Blog 已經教過我，若果為咗「睇落似成品」而拖 deploy，往往就永遠停喺本機 preview。醜但真係上線、真係照驗收表用，會逼出下一個實際問題（例如電郵連結、Google 跳轉）；靚但未 deploy 多數只係自己覺得安心，一上正式環境先發現卡喺設定。交功課站第一版我都揀前者。
以為壞咗，其實係設定
電郵登入連結本機收得到、正式收唔到：多數郵件設定、網域驗證，或正式站未重新上線。Google 登入跳轉錯：本機網址同 Google 後台登記唔一致。同步用戶資料失敗：舊資料庫限制要跑更新腳本。
本機若開兩個唔同預覽網址，登入狀態會亂（WhatsApp 通關嗰晚又中一次，詳見 第 5 篇）。我後期學識先查設定，再查程式。
Cursor 對話情境：本機有、正式冇
電郵登入連結本機收得到，正式環境收唔到。
請列正式站要核對嘅設定（登入網址、郵件服務等）。
限制：唔改登入程式，先查設定是否一致。最後係正式站登入網址仍指向舊網址。
畫面：可用先於完美
老師後台要一眼知下一步；學生端要清楚截止時間同上傳狀態。無障礙、統一錯誤提示係後段先補，唔阻塞第一版。
同 Blog 分開專案
靜態網站同交功課站 分開兩個 GitHub 專案（第 3 篇）。開新專案前我同 Cursor 講明：唔合併、唔改 Blog 文章，只要新站有登入頁同老師功課頁骨架。後期上傳或 WhatsApp 出問題，至少唔會拖死 Blog。
本篇小結
5 月主線係專案說明入面嘅最小完整流程，唔係功能大表；Plan 先梳理、再動工 係交功課站同 4 月 Blog 最大分別之一。範圍講清楚比花巧對話重要。下一篇：上傳、安全、Email 點排優先。
下一篇預告
第 5 篇 講成條流程通咗之後，點排檔案上傳、防刷、發布 Email、老師列表，同 WhatsApp 官方通道通關。
常見問題 FAQ
交功課系統第一版最少要有咩先有價值？
學生登入，睇到作業，交一份（文字或檔），老師睇到列表。WhatsApp 自動通知等可以後加。
點解交功課站要獨立專案，唔放喺 Blog？
登入、資料庫、密碼設定、更新頻率都不同。分開專案，兩邊 deploy 唔會互拖；同 Cursor 講清楚路徑，亦唔會同 Blog 出文時放錯 Markdown 資料夾搞亂。
老師角色點設定？
首次 Google 登入預設學生；測試時將帳號改為老師角色（詳見交功課站專案說明）。
About me
你好，我係阿丸。呢度以數位主權為核心，分享點樣用 AI 幫手整網頁、建立吸客贈品頁、整理內容同上線作品， 目標係幫你用更短時間把內容同網站做成可帶走、可維護嘅自有資產。
我會持續更新可跟做嘅教學、踩坑記錄同流程模板，等你唔使被平台黑盒綁死，亦唔使再由零重複試錯。
同時呢度會多寫一人公司最常遇到嘅訂閱制現實：工具加價、用量隱形成本、平台綁定風險， 同埋點樣用可執行嘅做法，將名單、主站同漏斗慢慢揸返喺自己手度。
你會見到嘅內容包括：支出檢視框架、用量上限與警報、搬遷前準備同主權策略；目標唔係一夜換晒工具， 而係先止血，再建立長期可維護嘅自有資產。
想先攞可跟做模板同檢查清單？
先由免費吸客贈品包開始，將文章做法變成你可即用嘅落地清單，再按需要對照服務範圍安排下一步。
想睇合作模式同交付範圍，可先睇服務與合作方式。